సంక్రాంతి పండక్కి గోల్కొండ హైస్కూల్ సినిమాతో ప్రేక్షకులను పలకరించిన సుమంత్ ఆశించినంత ఫలితం రాబట్టలేకపోయాడు. ఇప్పుడేమో రొమాంటిక్ యాక్షన్ ఎంటర్ టైనర్ గా తెరకెక్కించిన 'రాజ్' సినిమాతో వేసవికి ముందు సందడిచేయటానికి ఈ వారం ప్రేక్షకులముందుకు వచ్చాడు. కుమార్ బ్రదర్స్ సినిమా బ్యానర్ ఫై కుమార్ బ్రదర్స్, గౌటి హరినాథ్ సంయుక్తంగా నిర్మించిన ఈ చిత్రానికి వి.యన్.ఆదిత్య దర్శకుడిగా వ్యవహరించారు. ప్రియమణి, విమలా రామన్ లు సుమంత్ తో జోడికట్టిన ఈ సినిమాలో అజయ్, అలీ, సత్యం రాజేష్ తదితరులు ప్రధాన పాత్రలు పోషించారు. కోటి సంగీతాన్ని అందించాడు. జగన్ సినిమాటోగ్రఫీ అందించగా కెవి కృష్ణారెడ్డి ఎడిటింగ్ నిర్వహించారు. పెద్దగా హడావిడి లేకుండా మొదలైన ఈ సినిమా సుమంత్ ప్రియమణి ల ముద్దు సన్నివేశం విషయం బయటపడటంతో కాస్త జనాలకి తెలిసింది. ఆ తరవాత దర్శకుడినీ మార్చిన అంశం చర్చనియంశమై౦ది. ఆ ఫైన హీరోకంటే కూడా హీరోయిన్ల గ్లామర్, సుమంత్ ఇద్దరు హీరోయిన్ లతో చేసిన ముద్దు సన్నివేశాలు వంటి వాటినే ప్రధానంగా చేసుకుని ప్రచారం చేసారు. కుమార్ బ్రదర్స్ గతచిత్రం 'సాద్యం'కి కూడా ప్రియమణి గ్లామర్ నే అడ్డుపెట్టుకుని ఓపెనింగ్స్ తెచ్చుకున్నారు కానీ సినిమా పరాజయం పాలైంది, మరి ఈ సినిమా పరిస్థితి ఏమిటో మన సమీక్షలో చూద్దాం. కధ: రాజ్ (సుమంత్) మైథిలి (ప్రియమణి)తో పెళ్ళి నిశ్చయం చేసుకున్న తరవాత అనుకోని పరిస్థితుల్లో ప్రియ(విమల రామన్)ను ప్రేమిస్తాడు. ఆమె నే పెళ్ళి చేసుకోవాలనుకుంటాడు, కానీ సడన్ గా ప్రియ కనిపించకుండా పోతుంది. దాంతో తండ్రి మాట కాదనలేక మైథిలి ని పెళ్ళి చేసుకుంటాడు కానీ ఆమెకు దగ్గరవ్వలేడు. కొన్నాళ్ళకి ప్రియని మర్చిపోయి మైథిలి కి దగ్గరవుతాడు. అప్పుడు ప్రియ మళ్ళి కనిపిస్తుంది. ప్రియ తనను ఎందుకు వదిలేసి వెళ్ళిందో తెలుసుకోవటానికి ప్రయత్నిస్తే ఆమె చిక్కుల్లో ఉన్నట్టు తెలుసుకుంటాడు. ఆ క్రమంలో మైథిలి రాజ్ ను అపార్ధం చేసుకుంటుంది. ఇక అక్కడి నుండి రాజ్ ఏవిదంగా ప్రియను కాపాడి, మైథిలి ఫై తనకున్న ప్రేమను నిరూపించుకున్నాడు అన్నది మిగిలిన కధ. విశ్లేషణ: సినిమాటోగ్రఫీ తప్పించి రాజ్ సినిమాలో ఏ విభాగము, ఏ అంశము మేచ్చుకోతగ్గట్టుగా కానీ, గుర్తించుకో తగ్గట్టుగా కానీ లేదు. పాత చింతకాయపచ్చడి కధతో, బోరింగ్ కధనంతో ప్రేక్షకుల సహనాన్ని పరీక్షిస్తారు. దర్శకుడు వి.యన్ ఆదిత్య సినిమాఫై సరైన పట్టు ప్రదర్శించలేదు. సినిమాటోగ్రఫీ కాస్త పర్వలేదనిపిస్తుంది. ముఖ్యంగా మనాలి లో షూట్ చేసిన పాటను అందంగా తెరకెక్కించారు. సంగీత దర్శకుడు కోటి స్వరాలు ఆకట్టుకునే విధంగా లేవు. భీమవరం బుల్లోడా... పాట రీమిక్స్ కంపోజింగ్ కానీ చిత్రీకరణ కానీ ఒరిజినల్ పాట స్థాయికి చాలా దూరంగా ఉన్నాయి. ఈ సినిమాలో పర్వాలేదు అనుకునే సన్నివేశాలు కొన్నుంటే, బాగాలేదు అనుకునే సన్నివేశాలు బోలెడున్నాయి. సుమంత్ కు భిన్నకోణాల్లో నటించే అవకాశం లబించింది కానీ దర్శకత్వలేమితో నటన తేలిపోయి ఓ సాధారణ పాత్రగా మిగిలిపోయింది. ప్రియమణి తన సహజ ధోరణిలో చక్కగా నటించింది. మొదటి సగంతో పోలిస్తే రెండో సగంలో ప్రియమణి పాత్ర నిడివి తక్కువగా ఉంది. విమలా రామన్ యవ్వన ముదుసలి తనంతో కాస్త పెద్దావిడలా కనిపిస్తుంది. అలీ, శ్రీనివాస్ రెడ్డిలు చేసిన కామెడీ పెద్దగా ఆకట్టుకోలేదు. కొసమెరుపు: మొత్తం మీద రాజ్ సినిమా సినిమాకు తక్కువ సిరియల్ కు ఎక్కువ గా ఉన్నట్టు దియేటర్ దగ్గర ప్రేక్షకుల టాక్.
No comments:
Post a Comment