'ఘర్షణ', 'ఏం మాయ చేసావే' చిత్రాలతో తెలుగు ప్రేక్షకులకు సుపరిచితుడు అయిన తమిళ దర్శకుడు గౌతమ్ వాసుదేవ మీనన్ 'ఎర్ర గులాబీలు' అనే థ్రిల్లర్ సినిమాతో ఈ వారం ప్రేక్షకులను భయపెట్టే ప్రయత్నం చేసాడు. మన దేశం మూవీస్ బ్యానర్ ఫై అశోక్ వల్లభనేని ఈ చిత్రాన్ని నిర్మించారు. సమీర రెడ్డి, వీర, కార్తీక్ ప్రధాన పాత్రలు పోషించగా సమంత ప్రత్యేక పాత్రలో నటించింది. ఇక్కడ చెప్పుకోవలసింది ఏమిటంటే హీరోగా నటిస్తున్న కార్తిక్ ఒకప్పటి తెలుగు హీరోయిన్ మహేశ్వరి తమ్ముడు. ఈ సినిమాకు మనోజ్ పరమహంస సినిమాటోగ్రఫీ అందించగా అంటోనీ ఎడిటింగ్ నిర్వహించారు. తమిళ తెలుగు భాషల్లో నిర్మితమైన ఈ సినిమా తమిళ టైటిల్ 'నడిరాత్రి కుక్కలు' అని పెట్టడం విశేషం. ఒకప్పటి కమల్, శ్రీదేవిల సూపర్ హిట్ సినిమా 'ఎర్ర గులాబీలు' టైటిల్ తప్ప పెద్దగా అంచనాలు, ప్రచారం లేకుండా విడుదలైన ఈ సినిమా విశేషలేమిటో ఈ సమీక్షలో చూద్దాం.
కధ: ముంబై లోని ఒక సంపన్న కుటుంబంలో పుట్టిన సమర్ (వీర) కు తల్లిలేదు, తండ్రి కూడా చెడు వ్యసనాలకు బానిసై ఎనిమిదేళ్ళ చిన్నకుర్రాడు అని కూడా చూడకుండా సమర్ తో లైంగిక వేదింపులకు పాల్పడతాడు. దాంతో మానసికంగా దెబ్బతింటాడు సమర్. అతని పరిస్థితిని అర్ధం చేసుకున్న పక్కింటి మీనాక్షి సమర్ తండ్రి ఫై పోలీసు కంప్లేంట్ ఇవ్వటంతో జరిగిన దాడిలో అతను ఆత్మహత్య చేసుకుచనిపోతాడు. తండ్రి లేని సమర్ ను చేరదీస్తుంది మీనాక్షి.అతను పాతజీవితం మరిచిపోవాలని అని వీర గా పేరుమారుస్తుంది. కానీ మానసిక వైకల్యం అతన్ని వెంటాడుతూనే ఉంటుంది. ఆ క్రమంలో యుక్తవయసుకు వచ్చిన వీరలోని సమర్ మీనాక్షి మీదే వ్యామోహాన్ని పెంచుకుని ఆమెను బలవంతం చేస్తాడు. అతన్ని దూరంగా ఉంచటానికి ఒకప్పటి తన ప్రేమికుడు కృష్ణను పెళ్ళి చేసుకుంటుంది. వారి తొలిరాత్రి నాడే కృష్ణను దారుణంగా హత్యచేస్తాడు సమర్. అప్పుడు జరిగిన ప్రమాదంలో మీనాక్షి ఒళ్ళు మొత్తం కాలిపోతుంది. అయినా సరే అతన్ని క్షమించి తన ఆస్తినంతా సమర్ పేరున రాసి అతని తో పాటు హైదరాబాద్ వచ్చేస్తుంది మీనాక్షి. అక్కడ ఓ పెద్ద ఎస్టేట్ లో వాళ్ళిద్దరే ఉంటూ ఉంటారు. ఆ తరవాత తనలోని పైశాచిక కామాన్ని తీర్చుకోవటానికి అమ్మాయిలను అపహరించి చంపేస్తు ఉంటాడు సమర్. అలా ఓ మూడేళ్ళు గడిచిపోతాయ్ అప్పుడు అతనికి తన స్కూల్ మేట్ సుకన్య(సమీర రెడ్డి) కనిపిస్తుంది. ఆమెను ప్రేమించడం మొదలు పెడతాడు. కానీ ఆమె అర్జున్ ను ప్రేమిస్తుంది. అందుకని అర్జుని చంపి సుకన్యను కిడ్నాప్ చేస్తాడు. ఇక అక్కడి నుండి సుకన్య తప్పించుకునే క్రమంలో సమర్ కు సంబంధించి ఎన్నో ఆసక్తి కర విషయాలు బయట పడతాయి.. అవి ఏంటి అన్నదే మిగిలిన కధ.
విశ్లేషణ: గౌతమ్ వాసుదేవ మీనన్ తన స్టైలిష్ టేకింగ్ తో మరోసారి ప్రేక్షకులను కట్టిపడేసాడు. సినిమాలో ఎక్కువ భయపెట్టకపోయినా అందంగా చిత్రీకరించాడు. థ్రిల్లర్ తరహాలో కధ వున్నా అంతర్లీనంగా బాలలమీద జరిగే లైంగిక వేదింపులు, వాటి ప్రభావాలు, పరిణామాలు ఎలా ఉంటాయో చర్చించాడు. సినిమా మొత్తం సమర్ పాత్రను మూలంగా చేసుకునే రూపొందించాడు. మ్యూజిక్ డైరెక్టర్ లేకుండానే సినిమా చేసాడు గౌతమ్. అంతే కాకుండా ఈ సినిమా ఎర్రగులాబీలు, అపరిచితుడు చిత్రాలను గుర్తుకు తెస్తుంది. మనోజ్ పరమహంస సినిమాటోగ్రఫీ సినిమాకు ఆయువుపట్టు, ఎంతో వైవిధ్యమైన పనితనాన్ని కనబరచాడు. అంటోనీ ఎడిటింగ్ కూడా సినిమా మూడ్ ను బాగా క్యారీ చేసింది. సినిమాకు సెంటర్ పాయింట్ అయిన సమర్ అలియాస్ వీర పాత్ర చేసిన వీర ఆ పాత్రకు తగిన న్యాయమే చేసాడు, కానీ ఆ పాత్రకు అపరిచితుడులోల స్ప్లిట్ పెర్సనాలిటీ ఉంటుంది ఆ విషయం లో అతను అంతగా రాణి౦చినట్లు అనిపించదు. సమీర రెడ్డి పాత్రకు అనుగుణంగా బాగానే చేసింది. సమంతా గెస్ట్ రోల్ చేసింది అని చెప్పి చివరి షాట్లో చూపించడం ఆమె అభిమానులను భాదపెడుతుంది. ఇక మిగతా పాత్రలు మనకు పెద్దగా పరిచయం లేనివి అందులోను సమర్ పాత్ర మినహా మిగతా ఏ పాత్రకు చెప్పుకోదగ్గ నిడివి కూడా లేదు.
ప్లస్ పాయింట్స్: గౌతమ్ వాసుదేవ మీనన్ తన స్టైలిష్ టేకింగ్, మనోజ్ పరమహంస సినిమాటోగ్రఫీ ఈ సినిమాకు ప్లస్ పాయింట్స్
మైనస్ పాయింట్స్: నవ్యతలేని కధ, నెమ్మదిగా నడిచే కధనం, గ్రిప్ లేని మాటలు, సన్నివేశాలు ఈ సినిమాకు పెద్ద మైనస్ పాయింట్స్.
కొసమెరుపు: ఈ సినిమా ఎర్ర గులాబీలు సినిమాతో టైటిల్ లో మాత్రమే కాదు కధలో కుడా కొంత సారూప్యతను పోలి ఉంది, కానీ ఆ సినిమా అప్పటి ప్రేక్షకులను మెప్పించినట్టు ఈ ఎర్ర గులాబీలు మెప్పించడం కష్టమే అంటున్నాయి ట్రేడ్ వర్గాలు.
No comments:
Post a Comment